مع خالص الشكر والمذكور عقله شاط
بأسباب نكسه وحاله يكسر الخاطـر
|
والأن موجود في صحيـة الإحبـاط
عنده ممرض ومشرف جالس يناظـر
|
واللي لقينا في جيبه ما معـاه شنـاط
عدة رسائل قديمة مـا لهـا صـادر
|
للعلم نبغى ولي أمره يجـي يحتـاط
يومين مـرت ولا جالـه ولا زايـر
|
*******
|
الحال واضح لنا والخيـر بالقيـراط
موزون والعقل نعمة من لهـا شاكـر
|
والمبتلى بالردى ينحط في محطـاط
ما هوب لايق وهذي حيلـة القاصـر
|
و ما دام تحت الرعاية والعقل مطاط
والزهر من سالـف الأيـام متناثـر
|
يبقى الأمل للشفاء في كوية الملقـاط
من جمرة السمر مثل البنـدق الثايـر
|
بعض العرب شين علمه والعلوم فراط
وأمثال هذا المريض كثار يـا ساتـر
|
هم البلاء في تأخرنا مـن الإسقـاط
لعقولهم والمعـارف بحرهـا وافـر
|
والدين واضح وغيره للعقول خـراط
ما ينفع الناس غير الواحـد الغافـر
|
والأمـر لله والساعـة لهـا أشـراط
البعض منها ظهر والبعض متساتـر
|
من عهد طاها وحنّا بأخر الأشـواط
وما يعلم الغيب غير الواحـد القاهـر
|
لك من كنوز المعاني من حكم سقراط
والشعر روح الأدب ما يجلي الناظر
|
للصقر صقار والوطواط له وطـواط
والفرق بالوكر والجنحان والحاجـر
|
وصلي على خير خلق الله يوم بـواط
الشرك ولـى ذليـل وربنـا القـادر
|
صالح محسن الجهني
|
الصفحة الشخصية للشاعر السعودي العميد الطيار الركن (متقاعد) صالح بن محسن مهناء الجهني