المملكة والإمارات والبحرين تسحب سفرائها من قطر
الأربعاء 5 - 3 - 2014م - الرياض
.....
اللهم إنا نعوذ بك من الشيطان الرجيم
اللهم إنا نسألك أن تقينا شرور أنفسنا وشرور الفتن ما ظهر منها وما بطن
اللهم أحفظنا بحفظك وأحفظ لنا ديننا الذي هو عصمة أمرنا
وأحفظ وطننا وأخواننا في أوطانهم دول مجلس التعاون الخليجي
والأمة العربية والإسلامية
اللهم وحد صفنا وأجمع كلمتنا على البر والتقوى
" ما يجري على الساحة الخليجية سحابة صيف عابرة بإذن الله "
لا تقطعون الوصل لا تقطعونه
قطع الحبال يقطع القلب تقطيع
ولا تظلمون الود لا تظلمونه
أوصى عليه الله في خير تشريع
مجدٍ بناه رجال لا تهدمونه
صونوا كيانه لا يجي فيه تصديع
بالطيب والمعروف ربي يصونه
والصبر والحكمة تراها منافيع
بالعدل والإخلاص دامت حصونه
اللي حلاها مثل حلو الينابيع
ولا تجرحون القلب لا تجرحونه
يفرح علينا قوم مثل الجرابيع
أخشى لا يشمت حاقدٍ تعرفونه
مليان قلبه مع خبيث الأصابيع
ياما رمينا سهومنا في عيونه
ياما فتحنا وسط قلبه مشاريع
ولا عاد له قدره وخابت ظنونه
كل يوم وحدتنا على خير تطبيع
لجل الوفاء فينا عظيمة شجونه
الود ما يرضى على الود توديع
هذا خليج الود أجمل فنونه
اللي مع الرحمن في يوم ما يضيع
عيدوا مسار الود لا تتركونه
من قبل لا تكبر صغار المواضيع
والوقت يجري والقمر في سكونه
لو يختفي ليلة يجي له مطاليع
سبحان من يعلم خوافي شئونه
رغم انشقاقه ما جعل فيه ترقيع
صالح بن محسن الجهني
نشرت بتاريخ 6 / 3 / 2014م
