عميد طيار ركن متقاعد

لقب ( شاعر القوات الجوية ) تشريف وتكريم من صاحب السمو الملكي الأمير سلطان بن عبدالعزيز آل سعود ولي العهد نائب رئيس مجلس الوزراء وزير الدفاع والطيران رحمه الله فقد منحني إياه في حفل تخرج الدورة ( الحادية والعشرين ) من كلية الملك فيصل الجوية بالرياض عام 1402 هـ



الخميس، 23 يونيو 2011

عند الـوداع العيـن دايـم مطيـره ، حرفك يعزّ كتـوف ويميّـل كتـوف


قصيدة صاحب السمو الملكي الأمير نواف بن فيصل بن فهد بن عبدالعزيز آل سعود ( وداع .. وخيرة الله خيره )
وهي رثاء في والدته صاحبة السمو الملكي منيرة بنت سلطان بن عبدالعزيز آل سعود تغمدها الله بواسع رحمته ومغفرته ورضوانه واسكنها فسيح جناته جنة النعيم - إنا لله وإنا إليه راجعون - المصدر جريدة الجزيرة العدد 14146 يوم الأربعاء 20رجب 1432هـ

سبعٍ وخمس سنيـن يـا هـي مريـره
ما بين خسفٍ صاب دنيـاي  وكسـوف
يوم انطفت شمـس الجزيـرة  ظهيـره
وعني رحل فيصل وجت عجة  ظـروف
صـارت حياتـي لكـل الآهـات ديـره
وكنت الحـزن كلـه تعابيـر وحـروف
ودعت أبـوي ولا بقـي قلـب  غيـره
إلا خفـوق ٍكنـت بـه دوم محـفـوف
حضن الأمـان اللـي وهبنـي ضميـره
واللـي سقانـي كـل طهـرٍ ومعـروف
وأصـدق شعـورٍ لفنـي فـي حريـره
وأحن صدرٍ ضمني وأعـذب  وصـوف
أمـي بكـل أوصـاف توصـف كبيـره
ومن غيرها يقدر يبـرد علـى الجـوف
بنت السمو اللـي زهـت بـه  مسيـره
وأم الجريح اللي مـن العمـر محـذوف
سبـت فجعنـي والمنـايـا  شطـيـره
وحتوف لا حلّ القـدر طاحـت سيـوف
سبـت لحـق سبـت وتاهـت بصيـره
ورجعت اون وعـوّد الوجـه مخطـوف
أصيـح وأشهـق والسعيـرة  سعيـره
ويـاربّ صبرنـي ويـا ربّ  ملهـوف
فقدتهـا يـا ربّ هــدي  السـريـره
ما ابتل ريقي وينهـا؟ ويـا ظمـا روف
كن القمـر مـن عقبهـا مـات طيـره
وتوشح ثياب الكـدر واقبـل  خسـوف
عـزا.. وعزتنـي صفـوفٍ  كثـيـره
وما فيهـم اللـي رد صبـحٍ  لمكفـوف
مـا عـادت ديـار السهـارى  منيـره
ظلمـا هنـا وهنـاك والباقـي طيـوف
وذكـرى تزلزلنـي ودمعـة  غـزيـره
وطفـلٍ يتيـمٍ هـدّه البعـد والـخـوف
مكسـور ولا تنفـع بكسـره  جبـيـره
مقهور ، مـا بيـدّه ولا شـي مكتـوف
لبسـت ثيـاب احـرام عمـره أخيـره
وصار الكفن في عرش ربّ السما يطوف
ربــي يتقـبـل نيـتـك  يالفقـيـره
وحنّا برجـوى خالـق العالـم ضعـوف
يمـه : صمـت وموجعـاتٍ عسـيـره
وضيقه ورا ضيقـه وهـمٍ  وعاصـوف
يـمـه : وداع وخـيـرة الله خـيـره
وفي ذمة اللي كلنّـا بأرضـه  ضيـوف
أقـول : ويـش أقـول راحـت منيـره
يعني فقدت النبض والسمـع  والشـوف
أسير الشوق

الرد على هذه القصيدة الرائعة في شعر الرثاء  ( وداع .. وخيرة الله خيره ) لصاحب السمو الملكي الأمير نواف بن فيصل
  
عند الـوداع العيـن دايـم مطيـره
حرفك يعزّ كتـوف ويميّـل كتـوف
كالسيّف قاطـع والمعانـي  خبيـره
من يملك الإحساس بعيونه يشـوف
وشلون لاجـات المشاعـر أسيـره
على فراق أحباب والطرف  مطروف
عزاه يـا الدنيـا وتبقـي صغيـره
ما دام فيك الموت له كشف مكشوف
أصدق حروف الشعر مالـه نظيـره
شعر الرثاء يا الله بقلوبنـا تـروف
والموت حق ولكن الحـزن  حيـره
هذا الرثاء من ناقي الورد مقطـوف
إحساس صادق لوعتـه  مستجيـره
باللي فطرّها عيون لسهول  وخيوف
يا سيدي من كـل قلـب وعشيـره
نبعث تعازينا وحنّـا لـك  صفـوف
أبوك وأمك نسـل صقـر الجزيـره
غالي علينا والقـدر أمـر مكلـوف
نسأل لهم رحمـة عظيمـة  وفيـره
من ربّ بالغفران والجود موصـوف
ومثلك مع الرحمـن عينـه قريـره
يلهمكم السلوان والصبـر مخلـوف
ويمدّ في عمـرك ونعّـم  الذخيـره
ما قلت من معنى كما الدّر  مصفوف
عمّك وجدّك عـزّ شعـب ومسيـره
الله يمدّ اعمارهـم عمّـر مـردوف
بالخير وسيوف الأمـور  العسيـره
و رجال ابو تركي لهم مجد مرصوف
بالـدّر والمرجـان  والمستنـيـره
شريعة الإسلام خيراتهـا  صنـوف
فيصل رحل وتظـل سيرتـه سيـره
سيرة علم رفرف على عالي  النوف
ويالله أمير الطيـب ويـا  الأميـره
في جنة الفردوس في بابك ضيـوف
ابن الفهد وابن العقـول  البصيـره
يالله ترحمهم ويا هـم لنـا سيـوف
نجلي بهـم كـل الأمـور الخطيـره
تاريخهم تاريخ والمجـد  مسقـوف
بالنور مـن ربّ القمـر والهجيـره
والعلم ساس الأمر والخيل معسـوف
وإذا انتهت هذي الحيـاة القصيـره
والعمر أسرع شي بالكون  مصروف
نرجي من الرحمن رحمـة  غفيـره
لولا الأمل والصبر يا دنيتي  عزوف
 صالح محسن الجهني